 |
|
|||
|
|
|||
文/曹荣新(上海生物制品研究所)
阿拉单位去北大百周年纪念讲堂演出，表演个沪语“弄堂歌谣”，居然获得了大奖，迭个真个是扎足了阿拉上海人个台型。从北京表演获奖回来，伊拉侪跟我讲，要好好叫谢谢夜报《上海闲话》迭只专版，办得勿要太灵噢！真个帮了阿拉交关忙。
事体是迭能个，阿拉国药集团要求全国各地个所属企业用视频上报一只节目，既要表演，还要评比。伊拉搭阿拉请个导演邪气结棍，是CCTV文艺节目中心戏曲音乐部个赵导演，伊要求老严格个，迭趟演出可以讲是国药集团个“春晚”，大家侪老当一桩大事体。阿拉初排了一只歌舞串烧报上去，结果拨拉伊拉枪毙了。赵导演希望阿拉排一只有上海特色风情个节目，而且表演个辰光只有五六分钟。乃末大家集思广益，结果阿拉从新民晚报《上海闲话》版面浪得到启发，创作编排表演了一只叫《上海祝福》个节目。先由二【ni】胡搭仔萨克斯中西乐器结合伴奏，男声独唱“上海滩”开始，接下来再由六只女生小白兔搭仔四个男生组合，用沪语表演“弄堂歌谣”，最后是小虎队个《爱》表演唱结尾。结果迭只节目勿但通过了预审，而且垃拉北京个演出当中，受到了好评。大家觉着老新奇个。拍手声一浪高过一浪，表演一结束，大家围拢来问“弄堂歌谣”里说唱表演个内容，侪讲蛮有活力告童趣个，忒有地方味道了！迭只节目最终垃拉全国各地赴京汇演个廿只节目当中脱颖而出，获得了“最佳创意奖”，排列前三名，阿拉觉着邪气扎台型，侬讲嗲！现在回想起来，人家四川、兰州、新疆、北京等地表演个歌舞小品，也老灵个。不过阿拉要是呒没迭段沪语“弄堂歌谣”，节目恐怕就是死蟹一只了，评奖更加是想也勿要想。侬讲要勿要好好谢谢新民晚报《上海闲话》迭个良师益友？！现在，阿拉拿《上海祝福》当中个“弄堂歌谣”歌词唱拨大家听听：
男女合声：过年喽，开会喽，国药集团拜年喽！
女：今朝北京赞，阿拉开心来，
集团面貌新，每只单位侪精彩！
唱起来，跳起来，生命健康有关爱，
侬也来，伊也来，侬也来，伊也来，
国药明朝更加、更加赞！
男：垃拉北京看城头，
垃拉上海看人头，
城头加人头，碰拉一道别苗头！
生产好、科研好、营销好、管理好，
国药文化交关好，方方面面侪叫好。
男女合：集团一家团结牢，朝牢500强快点、快点、快点跑！
