麟康/画

　　文/周曙明

　　从小到大，大家侪叫我阿毛。记得垃拉我小个辰光，有趟上海泥城桥阿奶拉屋里讨新妇，我跟仔阿妈去吃喜酒，乡下头叫“掮轧车”。搿日子我着仔新个老布衫，老清老早跟仔姆妈沿牢仔公路走，直到十点半把，再摆渡到了市区里。

　　伲正垃拉弄堂里向跑【旧音读pao】末，拨几个上海小囡点点戳戳，只听到伊拉讲：“喔哟，看，阿乡、阿乡！”接着伊拉又唱：“乡下人到上海来，上海闲话讲勿来，咪西咪西炒咸菜……”。姆妈搭我讲：“阿毛啊，侬勿要理睬伊拉，千凶万凶，勿理顶凶；伊拉上趟能介到乡下头来，阿乌卵勿识哥窑碗，看见小麦当韭菜。阿毛啊，侬乖点噢，只管跟牢姆妈跑，泥城桥阿奶拉要到快呔【dha】。”

　　姆妈关照我讲：“等歇点吃饭个辰光，要闷声大发财，耷落仔眼脬皮只管吃；小菜咾，汤汤水水咾勿要滴滴溚溚弄仔一台子，肉骨头咾鱼骨头末，勿要倒垃地浪向，要拨上海人笑伲乡下人勿懂规矩个。”我只肚皮老早饿来瘪耗，里向垃拉唱空城计哉，真是要吃饭咾受个难。姆妈关照我个闲话，我迭只耳朵进，埃只耳朵出，瞎眼打秤——勿垃拉心浪。勿过，西风头里扬麦——一半淘成还是有个。姆妈讲“等歇点吃饭个辰光，要乖点”我记牢拉呔。

　　伊日子个酒水，记得是垃拉泥城桥南面路口头个一爿大饭店里吃个，坐垃一桌浪向个侪是陌生人。家家嘴巴浪“吃咾，吃咾”假客气，其实眼睛像个霍显，筷头像个雨点。有个三十多岁个上海亲眷，我也勿认得伊，人家垃拉背后头讲伊吃相恘【qiu】来，一条龙吃法：筷浪搛【ji】一块，眼睛盯一块，嘴巴里嚼一块，喉咙头咽一块，真是吃肉像个捣碌砖。我也算是开仔眼界仔。不过搿日子我还算乖个，只要乡下头平常时吃勿着个小菜，我只顾吃，真吃得来像只小八鲧，肚皮滴溜滚圆赛过一只篮球。

　　啥人晓得，上海吃酒侪是一顿头，夜饭呒没个，更加勿要讲敲瓫底呔。喔唷，幸亏我中饭吃饱，喉咙头小调羹也舀得着。我搭姆妈两介头回去，走仔廿多里路，到屋里个辰光，天已经墨赤里黑，我夜饭也吃勿落，汏汏脚就睏觉，第二日早浪向还有眼隔夜饱拉海。