|
||||
亦君/画
文/范永林“修——洋伞,阿有啥坏个橡皮套鞋修?。”老早子弄堂里个小修小补摊贩走进走出蛮闹猛,来来去去一喊就应,对阿拉来讲邪气方便。
搿个辰光真是啥物事坏脱侪好修补。侬屋里向碗仔碰碎了,只要勿是粉身碎骨,就可以补好。小摊贩除脱修洋伞,还有得箍桶个,专修木脚盆、马桶个,补碗、补锅子个,钢宗锅子底、配钥匙,伊拉个手艺真勿错,挑一副铜匠担,从前弄堂走到后弄堂。埃个辰光用个大大小小木脚盆,侪是一块块拼起来个,用铁条或铜条箍起来。你阿里一块坏了漏水了,伊可以补得同原来一模一样,天衣无缝。补碗匠有一种用手来回拉个小钻子拿碗钻几个小洞眼,然后拿分裂开个碗用小铜钉钉牢,一个分裂个碗被钉上七八个钉,还能用上好多年呢。更称奇个是还有补锅子个。老早子家家人家侪是用铁锅子个,辰光长了,铁锅子底部就裂开有洞了,乃末补锅个有一只火头老旺【yhang】个小炉子,拿铁垃拉小炼铁罐里烧成火红液体状,然后拿钳子夹牢小炼铁罐,倒垃拉厚厚个防火帆布浪,补垃拉铁锅子洞洞眼浪,等到冷却后,用砂皮一砂就好了。小摊贩个担子浪有一排铁皮,挑担走路辰光摇记揺记会发出“切嚓切嚓”声音,听到迭个声音就晓得铜匠担来了。
现在搿种阿拉老熟悉个“阿有啥坏个棕绷藤绷修?”、“削刀磨剪刀”个声音是再也听勿到了。